قالت الإعلامية بسمة وهبة، إن الرئيس عبدالفتاح السيسي يسعى إلى توفير حياة كريمة لكل أهالي الصعيد، موضحةً: “كلمة حياة كريمة بتطير النوم من عيون أعداء البلد، وفي نهاية العام، كل العالم يعيش في أزمات، لكن مصر خرجت من السنة دي مستقرة وتبني وتطور وتبني قرى وتطور فيها وتعمل في كل مكان”.
وخلال تقديم حلقة اليوم، من برنامج “90 دقيقة”، على قناة المحور، تابعت: “ما حدث في 7 سنوات لم يحدث في عشرات السنوات، مليون شكر من عندي من عندي ميكفوش، شكرا على إننا عايشين في بلدنا مطمئنين وإنك رجعتنا نحلم ونؤمن ببلدنا، وشكرًا إن ولادنا وأطفالنا وشبابنا بقى عندهم أمل إن الأحلام ممكن تتحقق وإن أبواب البلد مفتوحة للكل دون فساد ولا للمحسوبية، بشرط تكون مخلص وعندك اللي تقدر تمنحه للبلد”.
وأوضحت أنها كانت تخاف من تهديدات أهل الشر، وبخاصة أنهم هددوا المصريين بإراقة بحور من الدماء، لكن هذا الوضع تغير كليًا”، مردفة: “بس دلوقتي عايشة وشايفة إن أهل الشر في جحورهم، ومصر بقت منورة بالأمن والأمان وشرطتها وجيشها ولما بشوف الريس في قلب الشوارع قلبي بيتطمن لأني بشوف فرحة الناس إن عندها رئيس إنسان مخلص، أب ضهر قادر يسمعهم ويحميهم ويحفر معاهم في الصخر عشان يبنوا بلدهم ومكناش بنحلم بأحلى من كده”.
وأكملت: “أنا مواطنة مصرية تحب البلد وتعشق ترابها وأتابع وأشوف اللي بيحصل على أرضها من يوم ما حضرتك توليت المسؤولية، زيي زي كل المصريين وأمهات مصر، نفسي بلدنا تكون أحسن، صدقتك لما قلت إن مصر هتبقى قد الدنيا، وهنبني بلدنا من جديد، وسنخلق حباة كريمة لكل مواطن بعد سنوات من الارتباك وعدم الاستقرار والحياة التي لا تليق بالشعب المصري ولا بدولة بحجم مصر”.
وأردفت: “بس أنا كنت مشفقة على حضرتك، وبقول دي أحلام، وتصريحات وردية من بتاعة المسؤولين والرؤساء اللي بيقولوها في الأول، عشان ده اللي اتعودنا واتربينا عليه قبل ما حضرتك تمسك الحكم، كنت بسأل إزاي كلامك هيتحقق واحنا خارجين من ثورتين ودول حوالينا بتخبط في بعضها والاقتصاد بينهار، لكن بقول نفسي أنا مصدقة الرئيس لكنه هيحتاج 30 سنة عشان يعمل كل اللي بيقول عليه، عشان نخلص من الإرهاب والفوضى ونبني البلد من جديد”.
واختتمت: “يا ريس، انت عملت المستحيل وحققت أحلام مواطنة مصرية ببلد مستقر وقوي ويبني مستقبل، حضرتك حققت المستحيل وفي زمن مستحيل”.
