تلقت الفنانة نشوى مصطفى العديد من الانتقادات وصلت إلى حد التهديدات بعدما هنأت زملاءها من الفنانين الذين يشاركون في عمل درامي جديد بعنوان “الثمانية” يتصدى له تركي آل الشيخ رئيس هيئة الترفيه السعودية.
وردت نشوى مصطفى على تلك الانتقادات بمنشور عبر فيسبوك، قالت فيه: “بسبب البوست اللي فات فيه اصدقاء بيهاجمونى بالاسلحة الثقيلة.. وأحب أوضح — انا مش بجامل حد لان المسلسل خلاص اتسكنت ادواره وبيتصور — انا ضد الهجوم على زمايلى لانهم فعلاً فنانين كبار اى منتج يتشرف بالشغل معاهم — ولما قلت اي ممثل يتمنى يشتغل فى المسلسل ماكذبتش لان اسم مخرج كبير ومهم زي احمد مدحت اي حد يحلم يشتغل معاه — واسم مؤلف زي عمرو سمير عاطف اسم مهم”.
وتابعت: “ولما يكون فيه اسامى ممثلين زي زمايلى فى المسلسل مين ميتمناش يمثل معاهم — ولما يكون انتاج بالحجم ده يبقى عظيم — ايه بقى المشكلة وفين — نتفرج على المسلسل لما يتعرض وبعدين ننتقد لكن هجوم وخلاص اظن ميصحش — يومكم طيب وصباح الفل”.
وأضافت نشوى مصطفى: “اللي معترض على المسلسل معترض علي ايه بالظبط — اظن ممثلين كتير فى مصر يتمنىوا يشتغلوا فى المسلسل ده زي ماأى لاعب كورة كان يتمنى يروح يلعب فى بيراميدز.. ربنا يوفق الزملا ويحافظ عليهم من شر النق والحسد”.
واستكملت: “الطف تعليق واحد من الزملا بيقول اللي كان ليه نصيب فى المسلسل كأنه طالع اعارة يأمن مستقبله ويرجع يستقر.. اللهم ارزقنا الاعارة عاجلاً غير أجل.. واستكمالاً — المسلسل اخراج مخرج كبير اي ممثل يتمنى يشتغل معاه والمؤلف المشارك فى الكتابة مؤلف محترم ومهم جداً”.
وهددت مصطفى، بقولها: “وبعدين بقى — طيب اللي حيتجاوز فى اي كلام على صفحتى بعد اذنه حاعمل بلوك اخر بوست حاكتبه عن مسلسل الثمانية .. انا اسمى نشوى مصطفى — ممثلة من ٣٠ سنة — مفيش حد سندنى ولا ادانى فرصة اكبر من اللي استحقها يعنى عملت اسمى بمجهودى من غير مساعدة من حد — عمرى ورا ضهرى مش قدامى — يعنى لاحاجامل ولا حنافق حد علشان يدينى فرصة تخللى الناس تعرفنى — مادياً الحمد لله مستورة وربنا يديم عليا فضله”.
وأردفت: “الهجوم عليا علشان باركت لزمايلى وعلشان قلت ان اي ممثل يتمنى يشتغل فى مسلسل الثمانية لانه فيه مخرج كبير ومؤلف مهم وانتاج عظيم مش فاهمة ليه ؟ حاقول لكم انا ليه علشان باركت على مسلسل انتاج المستشار تركى الشيخ — انا لم اذكر اسمه فى البوست السابق علشان ماحدش يقول بتطبلى وبتنافقى وبتجاملى — ومع ذلك اتهمونى انى بطبل مع ان المسلسل خلاص ادواره كلها اتسكنت وبيتصور خلاااااااص”.
واستطردت: “ياجماعة الراجل عمل فى بلده نهضة ونقلة مرعبة وعظيمة فى المجال الفنى والترفيه — ايه المانع نستفيد منه فى الانتاج المصرى — لكن نتكلم بموضوعية بقى كده — المسلسل انتاج سعودى ولكن ٩٩ فى المية من العاملين فيه مصريين — فيه زميل واحد سعودى وزميل بحرينى — اللي معترضين ان المستشار ذكر انه صاحب الفكرة – الراجل قال انه اختار مؤلف مصرى يكتب معاه السيناريو والحوار — و قال انه اعتمد على فنيين اجانب فى الجرافيك والتصوير عملو اعمال عالمية — يعنى انتاجياً حيتصرف بشكل كبير جدا على عمل فنى — واحنا ليه نكره ان يكون فى عمل فنى مصرى متنفذ بشكل عالمى — ياجماعة نشجع مش نهاجم — ياجماعة الفن مالهوش وطن — يارب المنتجين تكتر يارب الاعمال الفنية تزيد يارب الفن يجمع مش يفرق يارب نتفرج الاول وبعدين ننتقد ونهاجم خلينا متحضرين بقى — والسلام عليكم ورحمة الله وبركاته”.
