فتحت الفنانة هند صبري قلبها وكشفت عن الكثير من الجوانب الخفية في حياتها الشخصية، وطريقة تعاملها مع الانتقادات والخوف من الفشل وكيف تواجه الطاقة السلبية وتنمى الجانب الروحي وتشبعه عن طريق التعبد والتأمل.
وحلت هند صبري ضيفة على برنامج “اتنين .. اتنين” مع إيناس سلامة الشواف عبر “راديو إنرجي 92.1” وتدور فكرته حول البحث عن الحاجة وعكسها داخل مشوار كل فنان، متى شعر بالنجاح ومنى شعر بالفشل، ما هو الموقف الذي أعطى له الأمل، وما الذي تسبب له في الشعور باليأس.
وفيما يلي أبرز تصريحات هند صبري في البرنامج:
– مش بحب السلبية أنا شخص إيجابي لو أقدر أعمل حاجة هعملها بحاول في مجالات مختلفة زي الحفاظ على البيئة أو دعم برنامج التغذية
العالمي.
– الجانب الروحى مهم جدا وبشبعه بالتعبد والتأمل والقراءة عن العوالم المختلفة والطب الهندى القديم.
– الخير والشر موجودين فينا كلنا وأهم ثنائية في الدراما، الثنائية دي اختيار شخصي تحب تنمى إيه وإزاي تواجه أي نزعة شر بداخلك وتجاهد نفسك.
– مش هنعرف طعم النجاح بدون تجربة الفشل ودايما بيكون لحكمة، ومش بفرح أوي بنجاحي ودايما بفكر نفسي إن النجاح بيجي بعد تعب كتير فالإحساس بيكون ممزوج بالمسؤولية وأصحابي بيقولولي أنتي نكدية.
– الخوف من الآخرين بيولد فينا شعور ممكن نفسره بأنه كراهية وفلسفتي في الحياة إني ميكونش في أحكام مسبقة على حد وأقدم المحبه عشان ألاقيها في المقابل والطريقة دي حققت نتايج ترضيني.
– الأمان والخوف ثنائية لكن هي نفسها الحب والخوف لأن سبب الأمان هو وجود المحبة، عمرك ما هتخاف في مكان فيه حب.
– في مهنتنا ثنائية الحضور والغياب مهمة جدا لأن الغياب كتير مقلق والحضور بكثرة غلط لازم توازن بينهم، وده صعب في زمن السوشيال ميديا.
– الصحة والمرض أهميتها وضحت أكتر بعد أزمة كورونا وبقيت أقدر نعمة الصحة وأسيبها على الله لأن التفكير فيها كتير يسبب خوف وده بيأثر على المناعة وبيعرضنا للمرض.
– في مهنتنا مهمة جدا ثنائية النقد والمدح بس مش بتأثر بيهم، ولو الفنان شاف قيمته الفنية مرتبطة بالمدح والجوايز هيبقى طول عمره أسير ليهم، مش بشكر ناقد مدح فيا لأنها مش علاقة شخصية هو بيأدي عمله وأما بقابلهم بقولهم كده وبيتفهموا ده.. ونفس الشيء، مش بكلم اللي رفض شغلي ومبزعلش.
على جانب آخر، أعلنت هند صبري عن إنتاج الموسم الثاني من “البحث عن علا”.
قالت هند صبري في فيديو نشرته عبر حساباتها بمواقع التواصل الاجتماعي: “طبعا هنكمل، علا قصتها لسه مخلصتش، ومش هي اللي علمتنا إن نهاية قصة هي بداية لقصة جديدة؟ يبقى عشان علا تاخد فرصتها التانية، لازم يبقى في موسم تاني من (البحث عن علا)”.
وأضاف: علا عبد الصبور مكملة معكم في موسم جديد من “البحث عن علا”، حصريا على Netflix، استنونا.
ومسلسل “البحث عن علا” تأليف مها الوزير وغادة عبد العال، إخراج هادي الباجوري، وبطولة هند صبري، سوسن بدر، هاني عادل، محمود الليثي وندى موسى إلى جانب عدد من ضيوف الحلقات، ومكون من 6 حلقات.
