كشف الفنان رامي جمال، عن سبب مساعدته للمطرب النقاش أحمد سالم،
وقال : أن سبب مساعدته هو سعيه للإرتقاء بالذوق العام.
واكد رامي جمال في مقطع فيديو له، عبر حسابه الرسمي بموقع الصور والفيديو «إنستجرام»، الأحد، إنه «عايز اتكلم عن حاجة مهمة جدًا علشان أنا شايف القبول اللي ربنا كاتبه للفنان أحمد سالم، أحمد فنان بدرجة مشوفتهاش في حياتي مرتين تلاتة، وأنا شايف أن الحب اللي الناس حبته ليه دي حاجة مش بتحصل كل يوم».
وأضاف :«وأنا فرحان جدًا أن مازال الصوت الحلو والفن الحقيقي الناس بتحبه وبتدعمه، وفيه ناس كتير فرحانة وبتقولي شكرا أنك بتساعد أحمد لكن أنا مش بساعده، أنا بساعد نفسي كفنان وكملحن أن الوسط الفني يبقى فيه أصوات زي أحمد عشان دي حاجة بترقى بالذوق العام ودي حاجة بقينا محتاجينها جدا كلنا».
وتابع :«أنا اتربيت في بيت أهلي أن الفرصة لما بتيجي لحد بتبان أن ربنا اللي باعتها، احنا كلنا أسباب لبعض يعني ممكن أنا أحاول أسهل على أحمد مشواره في الفن ودي حاجة بالنسبالي قمة في السعادة لأن في الأخر».
وأوضح :«“أنا وقت ما شوفت الفيديو بتاع أحمد مكنش منتشر بالشكل دا، لأن فيه ناس تانية بتقولي أنت بتساعد بس عشان التريند، والله عمرها ما كانت شخصيتي ولا هتبقى، لأن مفيش حد ضامن وهو بيحاول يعمل حاجة ونيته مش صافية أنها في الأخر هتوصله للنتيجة اللي هو عايزه».
وأكمل :«واللي باعتين ليا كدا أكيد موهوبين ومستنيين الفرصة وأكيد متضايقين وشايف أن الفرصة اللي ربنا اداها لأحمد هما يستحقوها بس والله بطمنكم، جايلكم كلكم الفرصة والرزق عند ربنا بمعاد وربنا لو سخرني لأحمد وسخر الجمهور لأحمد في أنه يبقى حابه دلوقتي فرصكم كلها جاية».
وأختتم حديثته :«عايز اقول لكل الناس اللي ما خدتش الفرصة أن ربنا يديكم أكتر من اللي اتمنتوه وإن شاء الله زي ما ربنا وقفني لأحمد ووقف ناس ليا زمان هيوقفلكم ناس، وبوجه رسالة لاحمد وبقوله كفايا برامج لحد ما نخلص الأغاني».
وعلي صعيد اخر قال الشاعر عمرو حسن، إنه سعيد بموهبة أحمد سالم المطرب النقاش، وأن صوته هو تعبير عن هوية مصر وصوتها، موضحا أنه إذا درس موسيقى سيكون له شأن آخر، لأنه حتى الآن لم يدرس موسيقى.
وأضاف خلال مداخلة ببرنامج «الستات مايعرفوش يكدبوا» الذي يذاع على قناة «cbc»، الأحد، أن آلاف المواهب تحتاج أن نسلط الضوء عليها، وربما خروج أحمد سالم إلى النور وللعلن أمام الناس وهو من على شاكلته، هو خطوة لإصلاح الذوق العام«.
وقال: «الأشياء المنظمة تكون أفضل، وأرغب أن يدرس أحمد الموسيقى، حتى يتقن الغناء بشكل سليم لدعم موهبته، وأنا عرضت عليه أن يحضر حفلي القادم ليراه الجمهور ويسمعه، وأعتقد أن الناس ستطرب بصوته المتمكن».
وتابع: «هناك الكثير من الملحنين الكبار لديهم رغبة أن يساعدوا أحمد سالم، مثل مصطفى العسال وسامح كريم وغيرهم من صناع الموسيقى ممن يعملون مع فنانين كبار على مستوى الوطن العربي».
فيما أكدت سارة المهدي، مدير أعمال عمرو حسن، إن المطرب أحمد سالم سيكون ضيف شرف حفلة الشاعر في مسرح الزمالك يوم 2 سبتمبر المقبل.
وذكرت أن هناك إقبالًا كبيرًا من قبل الجمهور خاصة الشباب على شراء تذكرة الحفل وكذلك تذكرة حفله على مسرح الزمالك والتي سوف تقام في 2 سبتمبر المقبل معربه عن سعادتها بهذا النجاح الكبير.
