تحدث الفنان هاني رمزي عن الضغوط التي تواجه الفنانين في مصر ورايهه في الفنان الراحل حسن حسني و مشروع انتاج جزء ثاني من فيلم غبي منه فيه
وقال أن الفنانين موضوعين تحت ضغط كبير بسبب كثرة الممنوعات في العالم العربي، ما يؤدي إلى تحجيم الفنان،
واضاف «عندنا ممنوعات كتير وهذه الممنوعات كتير مش قليلة، والفنان بيبقى دايما عنده طاقة وخيال وإبداع أنه يحلق من غير ما حد يؤيده».
وأضاف الفنان هاني رمزي، في حوار ببرنامج «حبر سري»، مع الإعلامية اسما ابراهيم، على قناة القاهرة والناس، عندي أفكار أفلام كثيرة لا يجوز أقدمها في مصر سواء دينيا أو سياسيا،
وتابع : «هتلاقي محاذير كتير جدا وعشان تطلع بحاجة تمس الناس هتلاقي كل فين وفين، وأنا مش بحب اطلع أقول مواعظ وأنا بعيش مع الناس لحظة».
وعن رأيه في أغاني المهرجانات، رد قائلا: «أنا مع عدم منع المهرجانات واللي مش عجبه ميتفرجش إنما حد يمنع فن وابداع أنا ضده، وخلي الكل يعمل اللي عايزه وأنت كجمهور نقي والمواطن هو اللي يختار وبسمع المهرجانات واكتر مطرب بحبه عمر كمال».
وكان النجم هاني رمزي أكد عدم وجود ممثل يستطيع أن يحل مكان الفنان الراحل حسن حسني، قائلا: «ولا فنان موجود يحل مكان حسن حسني وفي ناس كده مش هعرف استوعب بديل لها ومكانه سايب فراغ كبير جدا، وكان بيفنن في أي مكان ويسد في كل حته».
وأضاف هاني رمزي أن حسن حسني كان فنان عالمي وكنت بنبهر بوقفه بجانبه، متابعا: «لما كنت بقف جنبه ببص له ايه العظمة دي والأداء ده ويقدم الشخصية كما يجب أن تكون ونوعيته قليلة بمعنى الكلمة، وصعب جدا غبي منه فيه يتعمل من غير حسن حسني وممكن نعمل امتداد فقط».
ورفض الفنان هاني رمزي اعتبار بيومي فؤاد بديل لحسن حسني، قائلا: «بيومي فؤاد مش بديل لحسن حسني ولكن هو له شخصيته وطباعه وأسلوبه في الكوميديا، وظلم لبيومي يروح لمنطقة حسن حسني وكويس إنه محافظ على نفسه في منطقة وحتة معينة».
و كشف عن أن الفنانة نيللي كريم كثيرة الالحاح عليه لعمل جزء ثاني من فيلم غبي منه فيه، قائلا: «نيللي كريم قاعدة بتزن عليا نعمل غبي منه فيه جزء ثاني، ولما عملت الفيلم معايا كانت نجمة، ومفيش جيل في السينما المصرية يعوض الجيل بتاعنا».
ورد الفنان هاني رمزي عن رأيه في الفنانين الذين يطلقوا على أنفسهم ألقاب فنية، معلقا: «الجمهور هو اللي بيقول اللقب، وأنا مش نوعية الفنانين اللي بيطلعوا على أنفسهم ألقاب، ولو أنا من جمهوري هقول الفنان هاني رمزي وأنا شايف الفنان أعلى من أي لقب».
وعن حال توجه للإنتاج الفني للجيل الحالي، أشار إلى أنه سينتج لفنانين كوميديا لحاجة الناس إلى الكوميديا،
واضاف : «الناس محتاجة لكوميديا وكل اللي شغال دلوقتي ترجيدي وأكشن والناس في احتياج للضحك وأشد الحاجة للضحك، والنهاردة في الظروف الحالية بندور على حاجة ترفع الروح المعنوية للناس وده واجب وطني أنك ترفع من الروح المعنوية للناس، ولو هنتج هجيب حمدي الميرغني وتوته وعلي ربيع وأوس أوس».
وكان الفنان هانى رمزى، قال مجيبا على تساؤل: هل سيكون هناك جزء ثانٍ من فيلم «غبى منه فيه»؟، إن: «فكرة الجزء الثانى من غبى منه فيه تظل قائمة طالما أنها مطلب الجماهير لأن الجمهور أحب شخصية سلطان».
أكد النجم هاني رمزي، عدم تقليده للفنان رامز جلال في فكرة برامج المقالب، قائلا: «أنا مقلدش رامز جلال ولو كل واحد عمل برنامج مقالب يبقى بيقلد رامز مش حقيقي، وبرنامجي نجح، ولم أقدم برامج جديدة من هذه النوعية لأني مش لاقي فكرة كويسة».
وأشار الفنان هاني رمزي، إلى أن الدليل على نجاح برنامجه هو تقديم أكثر من موسم، مؤكدًا عدم معرفة أي فنان بطبيعة برنامج المقالب الخاص به، مضيفا: «محدش كان عارف حاجة ولازم تشك في ده كمشاهد وأنا وقعت فريسة لرامز جلال مرتين ولم أكن أعرف طبيعة البرنامج».
وتابع: «أنا قلبي ضعيف وكنت بقلق على اصدقائي خلال برنامج المقالب بتاعي، وفي حاجات متتقلش على الكاميرا، وفي ناس رفضت تعرض الحلقة زي وليد توفيق وديانا حداد رفضوا، وأنا مبحبش أزود على الضيف ولا اتجاوز معاه».
