كشفت الإعلامية رضوى الشربيني علاقتها بالرجال وعن مواصفات العريس المطلوب له وسبب انفصالها
قالت خلال استضافتها في برنامج «انا والقناع» الذي تقدمه الاعلامية منى عبدالوهاب أنها لا تدخل في عداوة مع الرجال، ولكنها تعادي من وصفتهم بـ«أشباه الرجال المنتشرين في المجتمع».
وقالت «أنا جيت في الدنيا بسبب راجل وهو أبويا وسندي في الدنيا راجل هو أخويا، وطليقي راجل محترم، وبالتالي أنا مش عدوة الرجالة، أنا عدوة أشباه الرجال، ولست عدوة للراجل، اللى بيضرب مراته مينفعش يتقال عليه راجل، واللي بيشغل مراته بالسُخرة، وهو قاعد في بيته مش راجل، واللي بيعشم دي ودي بالجواز وما يوفيش مش راجل».
وأكدت أنها صادفت الحب الحقيقي بعد انفصالها، مشيرة إلى إنها قصة وانتهت قائلة «قابلت الحب الحقيقي بعد الانفصال ومكنش تعويض عاطفي وإنما قصة حب حقيقية، ولكنها انتهت وانا مبحبش اتكلم عن القصص اللي انتهت بسبب اننا اتفقنا اننا لا نتفق».
اما عّن مواصفات الزوج الذي تتمناه قائلة «لازم يكون راجل قادر والقدرة هنا بمعنى إنه يكون قادر على العفو عند المقدرة عشان مبيصش على أخطائي ولا صغائر الأمور اللي انا بعملها وهيكبر دماغه ومش هيتلككلي ومش هيبص على عيوبي، ولازم يكون قوي ويشاركني كل أموري ويكون سند وقوته دي تكون معايا مش عليا ولما يقرر انه مش عاوز رضوى الشربيني مبعملش أي حاجة غير انه هيجبني ويقولي في وشي أنا آسف من قادر أكمل».
وأكملت وصفها قائلة «لازم يكون ناجح مقدرش أتجوز راجل مش ناجح ولا أنا اكون أنجح منه، ويكون عنده طموح ويتقي ربنا في البني آدمين وما أكونش أنا أولهم لكن مامته وباباه، ولازم يكون بيحبني قوي وبيهتم بيا قوي ويعرف يتعامل معايا لأن أنا صعبة، ويكون حنين وطيب ودمه خفيف عشان مقدرش اتجوز راجل دمه تقيل ابدًا، ويكون شيك وخفيف في نفسه».
كما قالت الشربيني «الحياة بعد وفاة امي اختلفت كتير وبقيت بعيط قوي، والناس واخده عني صورة المرأة الحديدية اللي من غير مشاعر ولا شعور وده عكس شخصيتي».
وأَضافت إنها لم تشعر بالوجع عندما امسكت ورقة طلاقها بيدها قائلة «رصيدي في بنوك الوجع أكثر بكثير من قسيمة الطلاق».
قالت عن تجربتها «اكتشفت نفسي ولقيت إني انسان مش قابل يعيش العيشة دي، ورصيدي في بنوك الوجع اكثر بكثير من قسيمة طلاق، ومقدرش أعد الأوجاع دي».
وتابعت: «قسيمة الطلاق مش وجع انما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وانا متوجعتش لما مسكت قسيمة طلاقي في ايدي، ومش في كل الاوقات كلمة انتي طالق بتوجع، خصوصاً اذا كان عندك قناعة إن الكلمة دي هي دوامي مش وجعك».
