علق الفنان احمد سعد علي الانتقادات التي تعرض لها بسبب ملابسه في حفل غنائي احياه في السعوديه وكان علي راس منتقديه طليقته الفنانه سميه الخشاب
قال سعد :أنا بشكر كل الناس اللي هاجمتني، لأنهم شايفين إني فرد من أسرتهم وواحد منهم ومارضيوش عليا كده إني ألبس حاجة وحشة، حسيت إني جوا كل بيت وجوا كل أسرة، مش هظهر كده تاني، ولو في حاجة شبك هخيطها أنا على إيدي.
وأردف أحمد سعد: الناس شايفنِّي في حتة تانية وجوا بيوتهم وأسرتهم، ياما ناس لبست كده ولبست حاجات تانية، ولكن أنا فعلًا مش الناس اللي بتصر على الحاجات الغلط، وبطلع أقول أنا غلط طالما معجبهمش.
وقال أحمد سعد على هامش حضوره حفل توزيع جوائز ميدل إيست ميوزك أورد MEMA في مدينة العلمين الجديدة: سمية الخشاب تقول اللي هي عايزاه، وكل واحد يقول اللي هو عايزه وهما كلهم جمهوري وكلهم ناس عايزين مصلحتي، وإنها ترقص على أغنيتي أكيد هي بتحب تشجعني دايمًا وأكيد بتحبلي الخير وإني أكون ناجح، وأكيد الناس مش عايزة تصطاد ليا الأخطاء، كلهم عايزنّي أبقى أحسن وبقيت بالفعل.
كما تحدث أحمد سعد عن زوجته علياء بسيوني، قائلًا: طبعًا هي السر الأكبر والأعظم في نجاحي وربنا يخليها ليا ويخلي ليا بنتي علشان بنتي مهمة جدًا.
وحصل الفنان أحمد سعد على 3 جوائز خلال حفل توزيع جوائز ميدل إيست ميوزك أورد MEMA في مدينة العلمين الجديدة، كأفضل مطرب، وأفضل فيديو كليب عن أغنية وسع وسع، وأفضل أغنية لفيلم عن أغنية إيه اليوم الحلو دا، والتي قدمها خلال أحداث فيلم عمهم بطولة الفنان محمد عادل إمام.
ومازح أحمد سعد الحضور خلال كلمته أثناء تسلمه الجوائز، قائلًا: مش كنتوا تقولولي أجيب حاجة أشيل فيها الجوائز، وبصراحة أنا سعيد جدًا بتكريمي.
وأهدى أحمد سعد جائزته لـ المنتج محسن جابر، قائلًا: كل ما أقابل حد في الشارع يقولي برافو عليك إنك غنيت الأغنية دي، ميعرفوش أن في وراها ناس بتتعب جدًا وهي دي أغانيهم لازم يتكرموا هما كمان، فأنا بهدي الجوائز دي للأستاذ محسن جابر، ومحمد محسن جابر، لأننا بجد تعبنا جدًا علشان نعمل الحاجات اللي بيحبوها.
