حرص أبناء الممثلة الراحلة نادية العراقية على زيارة قبرها ليحيوا ذكرى ميلادها، ونشرت مي ابنة نادية العراقية صور لشقيقها أدهم وهو يجلس إلى جوار القبر ومعه باقة ورد و”سوشي” الأكلة المفضلة لوالدته.
ونشرت مي ابنة نادية العراقية فيديو لمجموعة صور لوالدتها ووجهت لها رسالة مؤثرة: “ماما أول عيد ميلاد ليكي متبقيش جنبنا ومعانا أكيد أنتي دلوقتي في الجنة ومبسوطة مع الملائكة وتيتا وجدو وأخواتك.. كان نفسي أقولك كل سنة وأنتي طيبة وأبوسك وأحضنك وأعملك مساچ زي ما كنتي بتحبي .. والله يا ماما أنا مش مستوعبة إنك خلاص مشيتي وسبتينا من غيرك اتكسرنا من غيرك يا أمي أنا فعلاً مش قادرة أعيش من غيرك أنا عايزاكي وعايزة أشوفك بس عارفة أنه مينفعش لأنك عند ربنا الرحمن الرحيم وأكيد مبسوطة.. شكراً يا ماما على كل لحظة عشتيهالنا وعلى كل لحظة ضحكتينا وطبطبتي علينا أنا بحبك أوي بجد يا روحي .. دايماً كنتي بتحمينا و حتى لما مشيتي بتحمينا”.
وأضافت: “أنا بحس بيكي حواليا وبحس بأنك بتطبطبي علينا الحمدلله ربنا مصبرنا بس احنا موجوعين أوي يا ماما محدش فينا مستوعب احنا حاسين أنك مسافرة زي كل مرة وراجعة تاني وسطنا.. عمري ما كنت اتخيل أني هكتب كده و لا اني هحس الاحساس الصعب ده كنت دايماً واثقة انك هتفضلي عايشة و ربنا هيفتكرني قبلك بس ربنا أراد حاجة تانية الحمدلله، ماما الله يرحمك و يكرمك بجنته وسامحيني على أي حاجة كل سنة جاية وأنتي في الجنة وبين أيدين ربنا بحبك وتعاليلي في الحلم أشوفك”.
ورحلت الفنانة نادية العراقية عن عالمنا صباح يوم الأحد 16 مايو، بعد معاناة مع فيروس كورونا.
