خرج مغني المهرجانات حسن شاكوش للرد على الأزمة المشتعله بينه وبين المغني الشعبي رضا البحراوي.
وقال شاكوش في بث مباشر بموقع فيسبوك: “أنا مش بطلع أغني أغاني حد، أنت مش ليك أغاني ولا عندك CV، لإن الأغاني اللي بتغنيها مش بتاعتك، أنت مش بتصرف على أغانيك عشان عارف أنك لايف بس، كل قناتك عبارة عن تسجيل لحفلاتك بس، وإحنا جينا على نجاح مش على البايظ”.
وأضاف: “ولو شوفت الأرقام بتاعتي هتتخض، أغنية واحدة من بتوعي بتاريخك كله، وأنا بطلع أغني شغلي، لكن مش باخد إيفيهات من على التكاتك والميكروباصات، اجتهد وهات فكر من دماغك وبلاش تعلق همومك على شماعة غيرك، وعمري ما سمعت ليك أغنية في الشارع مكسرة الدنيا”.
وتابع شاكوش: “الغلط راكبك من ساسك لراسك، ولو على السب أنت اللي سبيت وجبت سيرتي بالاسم، أنت اللي قولت (فين حسن هو هرب أنا نفسي فيه)، أما أنا فذكرت إفيه من فيلم “حين ميسرة” والجميع فهم الإيفيه، وماغلطتش في أمك وأبوك، جزمتهم فوق راسي عشان في مقامي أهلي”.
ومن جانبه، أبدى الشاعر أيمن بهجت قمر غضبه من الألفاظ التي استخدمها كل من حسن شاكوش ورضا البحراوي، نشر فيديو لشاكوش وهو يغني باسم رضا في إحدى حفلاته، وكتب: “يا خرابه يا ابن ال…… في حفله عامه !!!!! دكتور خالد عبد الجليل .. ا. هاني شاكر ياريت تشوفوا الفيديو ده وانا متأكد ان ده مايرضيكوش .. بجد عيب اللي حصل ده وماينفعش يعدي”.
وتعود تفاصيل الخلاف بين شاكوش والبحراوي منذ أيام في أحد الحفلات التي جمعت بينهما في الساحل الشمالي، فعندنا صعد شاكوش على المسرح، وكانت فرقة رضا مازالت متواجدة على المسرح، فقرر مطرب المهرجانات أنه لن يستكمل فقرته إلا عندما تغادر الفرقة الأولى المسرح، ونُفذ طلبه ذ وسط استياء من أعضاء الفرقة.
وقبل انتهاء فقرة شاكوش، صعدت فرقة البحراوي من جديد للمسرح، مما أثار غضب شاكوش، ووجه لهم إشارات خارجة وبذيئة، فردت عليه الفرقة وتبادلوا السباب، لولا تدخل حمو بيكا لتهدئة الوضع.
