وجه الفنان وائل عبد العزيز، شقيق الفنانة ياسمين عبد العزيز، رسالة استعرض خلالها تاريخ والده، وذلك عبر حسابه الشخصي على موقع التواصل الاجتماعي فيسبوك.
وقال وائل عبد العزيز: “على اليمين النجم الكبير الأستاذ حسن يوسف، ربنا يديله الصحة والعافية، واللي على الشمال الأستاذ محمد عبد العزيز.. كانوا أصحاب، ومثلوا مع بعض في الجامعة، عدت السنين، ومحمد عمل كام دور صغير، واتجوز، والظروف مكانتش في صالحه، مع إنه ممثل شاطر.. لكنه اختار يبعد عن حلمه، عشان يعرف يشتغل ويربي ولاده اللي بقوا 3”.
وأضاف: “وكمل محمد دراسته لحد ما وصل للدراسات العليا والدكتوراه، في إدارة الأعمال، واشتغل في فندق من أكبر فنادق مصر، وترقى إلى أن وصل لمنصب رئيس للمخازن والحسابات لهذا الفندق”.
وتابع: “قعد محمد طول حياته يزرع موهبته في عياله، وكان بيحب يغني، ويمثل، ويقف يمثلهم أهم المشاهد العالمية، باللغة العربية، وبالعامية، وفي يوم اكتشف عملية اختلاس كبيرة في الفندق، وقف قدامهم كلهم، وأخد خطوات قانونية تجاههم.. لكنه كان لوحده فمقدرش عليهم”.
وأضاف وائل: “اكتأب وساب الشغل، ولأنه راجل مبيفوتش فرض، راح لربنا أكتر، وزهد الدنيا بما فيها، وكبر، وعدت السنين، وفضل محمد بنفس الروح الجميلة الطيبة، راضي بأمر الله، ومبسوط في حياته.. الراجل دا أبويا اللي باتشرف بيه، واللي عمره ما كدب، أو مكانش حقاني، اللي علمني إن الحق أحق أن يتبع، وكان بيقولي لو آخر يوم في عمرك قول الحق.. ربنا يديك الصحة يا والدي ويخليك ليا”.
