شن الإعلامي سيد علي هجوما حادا على الفنان محمد رمضان، بعد قيام الأخير بنشر فيديو أعلن فيه عن تلقيه اتصالا يفيد بالتحفظ على أمواله في أحد البنوك.
وقال الإعلامي في برنامجه “حضرة المواطن” على قناة الحدث اليوم: “الممثل الموهوب محمد رمضان عدو نفسه. لما يطلع يقول الدولة حجزت عليا، لا يا بابا الدولة محجزتش عليك، وأنت تبعث رسالة خاطئة للمستثمر الأجنبي والمستثمر المصري، إن الدولة المصرية بتحجز على أموال المصريين. هي حجزت لأنك إنت موّت واحد طيار، والمحكمة حكمت له ومدفعتش، بتاخد حق الراجل دا”.
وتابع: “الحقيقة النجومية مسؤولية، طالما إنت نجم بقيت مسؤول عن تصرفاتك وكل كلمة تقولها. إنما مسألة الاستخفاف في زمن اليوتيوب، كل واحد يتنطع ويطلع على اليوتيوب يخاطب الناس من علياء وأنا بشرب القهوة وأنا عندي فلوس أد كدا”.
وأضاف: “في كلام كتير جدا مش حابب أقوله، لأن أنا بعترف قدام حضراتكم إن محمد رمضان ممثل موهوب وغول، وفي أمس الحاجة إلى أن يأتي حد رشيد يدير له موهبته. وأظن إن القوة الصلدة المصرية في حاجة إلى إنها تمسكه من ودنه حفاظا عليه، تقوله استقم يا رجل أنت تخاطب شعب مصري، 70 أو 80 % منه بيخرجوا الصبح من بيوتهم بعرق جبينهم عشان يجيب قرش حلال يربوا ولادهم بيه، معندهمش بسين ومعندهمش أسطول عربيات، خاصة إذا كنت شبه هؤلاء الفقراء وخاصة لو كنت بتدعي إنك منهم. إنت لست منا يا سيدي، إنت عدو نفسك”.
