كشف الفنان شريف دسوقي موعد خروجه من المستشفى وعودته للعمل، إذ قال خلال مداخلة هاتفية مع الإعلامي عمرو أديب في برنامج “الحكاية” على قناة MBC مصر: “أنا شغال بروفات حاليا، بحضر شغلي دلوقت، وبيبعتولي الورق بدل ما أنا قاعد في المستشفى عندي وقت كتير. قدامي بالظبط مش أكتر من 25 يوم”.
ووجه شريف دسوقي الشكر لكل من اهتموا بحالته الصحية، وقال: “أنا مش عارف أشكر السيد الرئيس عبد الفتاح السيسي، ولا السادة الوزراء اللي وقفوا معايا، ولا دكتور أشرف زكي. لكن عايز أشكر حد بشكل كبير جدا وهو أستاذ أحمد الجنايني، اللي شالني فعلا. كنت بصور معاه الفيلم ومش قايله إني تعبان، مسابنيش لحظة، اتنقل من مستشفى لمستشفى ورا مني، وكمان الشركة المتحدة مسابتنيش ولا لحظة. من ساعة ما عملت مع حضرتك المكالمة وهما متولين كافة شيء. الحمد لله أشهد إن عندنا طب عالمي”.
كما توجه شريف دسوقي برسالة إلى الشباب قال فيها: “كل اللي عايز أقوله لكل شبابنا مفيش حاجة اسمها خلاص خلصت كده، وأيأس وأقعد في البيت وأطول دقني، وأقول خلاص راحت عليا. أنا مكمل وولادي في الوسط عارفين كويس إرادة شريف دسوقي يعني إيه..فعلا الجملة اللي إتقالت في أحد المسلسلات “معندناش حداد”، إحنا مبنحزنش على حاجة، إحنا شعب مصري كل العالم بيقتدي بيه”.
