ينشر ” موقع مصر” نص التحقيقات مع المتهم بالتستر على «مُتحرش المعادي» .
س : اسمك، وسنك، ووظيفتك؟
ج : اسمي مدحت سمير محمد معوض ، 38 سنة ،اعمل فني صيانة تكييفات.
س : ماقولك فيما هو منسوب إليك من أنك متهم بكونك على علم بقيام المتهم بارتكاب جنايتي خطف الطفلة المجني عليها يارا السيد حمدان وهتك عرضها واعانتك له علي الفرار من وجه القضاء بأن قمت بايوائه بمسكنك خشية إلقاء القبض عليه علي النحو المبين بالتحقيقات ؟
ج : محلصش وانا معرفش ايه اللي عمله محمد غير لما اتقبض عليه.
س : ما الذي حدث اذا وما ظروف ضبطك واحضارك ؟
ج : اللي حصل ان امبارح ٩ / ٣ / ٢٠٢١ حوالي الساعة ١١ صباحا كنت نايم في بيتي ولقيت الباب بيخبط ففتحت ولقيته محمد وقالي انه متخانق مع اهل بيته وعاوز يقعد معايا شوية وعايز يريح شوية فأنا اخدته ووديته مخزن عبارة عن اوضة لستي الله يرحمها موجودة في ممر خالد بن الوليد من شارع تحت الربع _ الدرب الاحمر وقولته يقعد هنا لقيته بيقولي أنه عايز يشحن تليفونه عشان يكلم محامي بس مقاليش ساعتها عن السبب وأنا قولتله هوصل مشوار مع والدتي وأشوفلك محامي وبعدها سيبته ومشيت ووصلت والدتي وطلعت علي ورشتي لقيت ضابط من مباحث الدرب الاحمر سالني عن محمد وقولتله ده بايت عندي في المخزن بتاعي فطلب مني اوصله لهناك وخدني معاه وبعدين قبضوا علي محمد وخدوني على المديرية وهناك الضباط وروني الفيديو اللي ظاهر فيه محمد وهو لابس بدلة وبيتحرش بطفلة ساعتها كنت أول مرة اشوف الفيديو ده واعرف الموضوع ده
س : متي واين حدث ذلك ؟
ج : وقت لما محمد جاني اول مرة كان امبارح ٨ / ٣ / ٢٠٢١ حوالي الساعة ١١ الصبح في بيتي ٩ حارة العنبري _ المغربلين _ الدرب الاحمر
س : من كان برفقتك انذاك ؟
ج : كنت لوحدي
س : وما الحالة التي كان عليها المتهم حال تقابلك معه انذاك ؟
ج : كان باين عليه متوتر ومرتبك
س : وهل وقفت علي سبب تلك الحالة التي ظهرت علي المتهم ؟
ج : لا
س : وما الذي حال دون ذلك ؟
ج : عشان كنت مستعجل اودي والدتي تغسل كلي
س : وهل اخبرك المتهم محمد جودت عن سبب حضوره اياك انذاك وعن سبب ظهور تلك الحالة عليه ؟
ج : لا كل اللي قاله إنه عنده مشاكل مع أهل بيته ومحتاج محامي وانا قلتله هخلص مشوار والدتي واشوفلك محامي
س : وعلام انتهي ذلك اللقاء ؟
ج : متكلمتش معاه تاني وخدته وطلعت علي مخزن اللي كانت قاعدة فيه ستي الله يرحمها وقلتله يقعد هناك وسبته ومشيت ساعتها
س : والي اين توجهت عقب ذلك ؟
ج : خلصت مشوار والدتي ووصلتها بعدين روحت علي ورشتي
س : من القائم بالقاء القبض عليك ؟
ج : ضابط مباحث الدرب الاحمر اسمه باسم بيه
س : وما سبب ضبطك تحديدا ؟
ج : سألني على محمد وقلتله اني مقعده في مخزن ستي وطلب مني اوصله لهناك
س : وما هو مدي استجابتك له ؟
ج : بالفعل خدت الضابط ووصلته لمحمد وقبضوا عليه ساعتها وكانوا ودوني لوحدي في المديرية
س : وهل وقفت علي سبب ضبطك ؟
ج : في المديرية ضباط ورتني فيديو لمحمد وهو لابس بدلة وبيتحرش بطفلة صغيرة في مدخل عمارة وأنا ساعتها كنت اول مرة اشوف الفيديو ده وأول مرة ساعتها أعرف محمد عمل كدة
س : وهل قام أحد بتفتيشك ؟
ج : ايوا وخدوا تليفوني
س : ما هي طبيعة علاقتك بالمتهم محمد جودت حسين وهل من ثمة خلافات سابقة فيما بينكما ؟
ج : احنا اصحاب ومفيش خلافات ما بينا
س : وما قولك فينا أقر به المتهم بالتحقيقات من انه توجه اليك عقب حدوث الواقعة واعلمك بما اتاه قبل المجني عليها فعرضت عليه المكوث بمسكن خاص بك كمساعدة منك له لحين تدبير وتوفير احد المحاميين وتسليم نفسه للشرطة ؟
ج : الكلام ده محصلش ومكنش في وقت اننا نلحق نقعد مع بعض اصلا وانا معرفتش بموضوع محمد غير وانا في المديرية من الضباط
س : وما تعلقيك لما قرره سالف الذكر ؟
ج : معرفش
س : ما هي طبيعة علاقتك بالعقيد ايمن وحيد مفتش فرقة مباحث مصر القديمة وهل من ثمة خلافات سابقة فيما بينكما ؟
ج : معرفوش
س: وما قولك فيما اثبته سالف الذكر بمحضره المؤرخ ٩/ ٣/ ٢٠٢١ الساعة ١٠ مساءا من ان تحرياته توصلت الي قيامك باخفاء المتهم محمد وبمناقشتك اعترفت له بأن المتهم محمد جودت لجأ اليك صباح اليوم وطلب منك مساعدته في الهرب من الملاحقة وتدبير مكانا امنا عقب ان سرد لك الواقعة التي ارتكبها فقمت بتدبير سكن قديم له معد كمخزن بممر خالد بن الوليد الدرب الاحمر وبارشادك تم التوجه الي المكان سالف الذكر وامكن ضبط المتهم ؟
ج : هو فعلا الحكومة جاتلي وسألتني علي محمد وانا وديتهم ليه بس محمد لما جالي مقاليش علي اللي عمله مع الطفله والحوار ده انا عرفت بيه وانا في المديرية
س : وما تعليقك لما اثبته الضابط سالف الذكر ؟
ج : معرفش
س : ما صلتلك بالمجني عليها يارا السيد حمدان وهل من ثمة خلافات سابقة بينكما ؟
ج : معرفهاش
س : هل سبق ضبطك في قضايا مماثلة من قبل ؟
ج : لا
س : هل لديك ثمة سوابق جنائية ؟
ج : لا
س : انت متهم بكونك علي علم بقيام المتهم بارتكاب جنايتي خطف الطفلة المجني عليها يارا السيد حمدان وهتك عرضها واعانتك له علي الفرار من وجه القضاء بأن قمت بايوائه بمسكنك خشية القاء القبض عليه علي النحو المبين بالتحقيقات ؟
ج : محصلش وانا معرفش ايه اللي عمله محمد غير لما اتقبض عليه
س : كما انك بعدم حمل بطاقة تحقيق شخصية حال كونك قد بلغت السادسة عشر عاما وكونك احد رعايا جمهورية مصر العربية ؟
ج : بطاقتي في ضابط اخدها مني
س : هل لديك أقوال اخري ؟
ج : لا.
