وجهت الإعلامية ياسمين عز بعض النصائح للسيدات بشأن التعامل مع صديقاتهن، مؤكدة أن جميع نصائحها مبنية على أسس دينية.
وخلال برنامجها “كلام الناس” عبر فضائية “إم بي سي مصر” قالت عز: “جوزك لو اتساب مش هيتجاب وبلاش تتريقي عليا لما بقولك صاحبتك هتسرقه منك، إيه موضة تحكي لصاحبتك أسرارك دي؟ أنتوا بتدعوا لدين جديد؟ حرصي على جوزك وأعملي الصح معاه وحاوطي عليه ولو مزنوقة في كلمتين فضفضي له لأنه هيهز راسه وهينسى وبلاش تثقي في صحباتك”.
وتابعت عز: كلامي دا لكل البنات وأي واحدة صاحبتها سرقت جوزها منها ومش بخصص حد معين، وبقولك أشغلي نفسك بجوزك ومتقوليش أسرارك برا، وصاحبتك اللي بنت أصول ولها كبير وعندها أب يقطم رقبتها ميتخافش منها ودي استثناء لأنها هتخاف إنما فيه صاحبات تانيين بتكلم عنهم.
بلاش الثقة المفرطة
وأكملت عز: بلاش الثقة المفرطة في صديقاتك وأنا حذرتكم وقولت لك اعملي حدود للصداقة مع الكل وحياتك مع جوزك متكونش مشاع للجميع، وبقول كدا بناءً على الدين لأن مينفعش حد يختلي بحد وأنتوا بتكئبوني لأني مش بنظر عليكي وشوفنا أنه بيحصل أهو، ولازم تعملي الصح مع جوزك.
وفي وقت سابق أوضحت الإعلامية ياسمين عز، إتيكيت التعامل مع الزوج، قائلة إن الزوج نعمة من الله مثل نعمة الطعام والشراب بل وأفضل من ذلك، مردفة: “فيه حاجة اسمها إتيكيت التعامل مع الزوج، لأن الراجل نعمة من ربنا زي الأكل والشرب وهو أحسن كمان، هذه النعمة ليها إتيكيت زي ما فيه آداب التعامل مع الطعام فيه آداب للتعامل مع الزوج”.
إتيكيت التعامل مع الزوج
وخلال برنامجها “كلام الناس” عبر فضائية “إم بي سي مصر” تابعت عز: “لو بتتكملي مع صاحبتك أو مامتك وزوجك جه فورا تقفلي علشان الفرعون الكبير وصل.. كده تأسريه لأنه لازم يحس أن دخوله ليه هيبة ووضع، حتى لو هتروحي تقوليله نورت بيتك حمد لله على السلامة، زي ما كنا طلاب والمدرس يدخل الفصل كنا بنقفله، زوجك أحسن من المدرس، اللقطة واللفتة البسيطة دي هتأسريه بيها حتى لو هتطلي من باب المطبخ وترجعي لحلة المحشي، لكن لازم يبان له إن فيه إحساس، ولو مدياله ضهرك لفي وشك على طول وسيبي الحاجة اللي في إيدك”.
