شرحت الإعلامية ياسمين عز إحدى الحالات التي تتغير فيها شخصية العروسة كليا، من شخصية رقيقة تظهر المحبة الشديدة لحماتها، إلى شخصية تضغط على العريس حتى يخالف رأي والدته.
وقالت ياسمين عز خلال تقديمها برنامج “كلام الناس” المذاع عبر قناة MBC مصر: “البنات اللي بيكونوا قبل قراءة الفاتحة زي النسمة عمرك ما تسمع لها حس، ومش بتقول غير حاضر ونعم، ولو تطول تشيل أم العريس المنتظر فوق دماغها وتلف بيها في الشوارع زي المروحة”.
وأضافت موضحة لحظة التغير في شخصية العروسة: “يوم ما ينزلوا يختاروا الفرش، تلاقيها مكلمة عريسها، أنا محدش يختار الفرش عشاني، ولو مامتك نزلت معاك بكرا أنا مش نازلة ومش عايزة أتجوز، وتقفل السكة وتعمل للعريس بلوك على واتس آب”.
وتابعت: “تلجأ لكل الوسائل عشان تضغط على العريس، وتلعب على وتر أنا عايزة أحس إني متجوزة راجل بجد، وأنا وهو كيان مستقل، عايزة تاخدك من أمك، لحد ما إنت من كتر الصداع تنفذ اللي في دماغها، وتكسر بخاطر أمك الحنونة”.
