وجه الفنان هاني شاكر رسالة شديدة اللهجة لـ مؤدي المهرجانات الشعبية حسن شاكوش، بعد قرار النقابة بوقف عدد من مؤدو المهرجانات منهم شاكوش.
وقال هاني شاكر في مداخلة هاتفية ببرنامج على “مسئوليتي” المذاع عبر قناة “صدى البلد”: “حسن شاكوش عمل مشكلة كبيرة على المسرح، واحنا مقلناش له متغنيش في اليوتيوب أو اطلع غني بره في أي دولة، احنا ممنعناش حد، لكن أنت محترمتش المسرح وغنيت عليه ومعاك تصريح من نقابة محترمة ولم تحترم فئة من فئات الموسيقيين عازفي الإيقاع، واتريقت عليهم وقلت كلام خارج يعاقب عليه القانون”.
وتابع شاكر عن شاكوش قائلاً: “مينفعش اديله تصريح، وقرار وقفه كان بالإجماع بسحب تراخيصه من النقابة على أساس مينفعش يغني على أي مسرح، واللي عايز يسمعه على اليوتيوب، لكن لن يغني في حفلات أو أفراح داخل مصر، لكن برة مصر الدنيا كلها فاتحة دراعتها يشتغل زي ماهو عايز”.
